കാണുവതെങ്ങനെ!?
കാണുവതെങ്ങനെ..... !?
എവിടെയൊളിക്കും ഞാന്‍ !!
ചോരകുടിച്ചു മഥിക്കുംകഴുകന്മാര്‍
വിത്തുകള്‍ കൊയ്യുന്ന,
അടിവേരുകള്‍ പിഴുതെടുക്കും
അരുംകൊലകൾക്കു ചുടലക്കള-
മൊരുക്കുവതു കാണുവതെങ്ങനെ!
എവിടെയൊളിക്കും ഞാന്‍ .......?
കണ്ണിമകള്‍ ഇറുക്കി പൂട്ടട്ടെ
അതിലെനിക്കെന്റെ
മണ്ണിന്‍ മഹിമകളെ
അടച്ചുവയ്ക്കണം !
നക്രതുണ്ഡികളുടെ, ശിഖണ്ഡികളുടെ
ബാണമേൽക്കാത്ത
പെണ്ണുടലുകളുടെ ശാപമേല്‍ക്കാത്ത
മണ്ണിന്‍ കാഴ്ച്ചകളെയെനിക്കതില്‍
ഒളിപ്പിച്ചുവയ്ക്കണം!
വിഷപ്പുകതീണ്ടാത്ത,
ഗർഭത്തില്‍ കുരുതികൊടുക്കുംഅമ്മ-
മാരുടെ നെഞ്ചുപിളർക്കും
മാംസപിണ്ഡങ്ങളായ്‌ പിറന്നുവിഴും
ജീവനുകള്‍; എവിടെയൊളിപ്പിക്കും
ഞാനെന്റെ കാഴ്ച്ചകളെ !
നിണമണിഞ്ഞും,നൂപുരംകെട്ടിയും
കൊടികെട്ടിയ അക്ഷൗഹിണിപ്പടകള്‍
കൊടുംച്ചതിക്കുഴികള്‍ ഒരുക്കുന്നു ;
കരിനാഗങ്ങള്‍ ഫണം ഉയർത്തും
സുരസുന്ദരിമാര്‍
അമൃതകുംഭങ്ങള്‍ നിരത്തി
ചാട്ടവാറും കടിഞ്ഞാണുമേന്തി
പീഡനതേരോട്ടത്തില്‍
ഹർഷപുളകിതരാകുന്നു.
കാണുവതെങ്ങനെ.....?!!
ചോരകിനിയുന്ന ജരാനരമൂടിയ
എന്റെ മണ്ണിന്‍ കാഴ്ചകളെ !
എവിടെയൊളിക്കും ഞാന്‍ !!?
കണ്ണുകള്‍ പൊത്തട്ടെ
ദിഗന്തങ്ങള്‍ പൊട്ടുമാറുച്ചത്തില്‍
പൊട്ടിത്തെറിക്കട്ടെ !
തേന്‍ പുരട്ടിയ കയ്പിന്‍ പാനപാത്രങ്ങള്‍
തട്ടിത്തെറിപ്പിക്കട്ടെ
തമോഗർത്തങ്ങള്‍ പിളർന്നിടട്ടെ!
അല്ല! സീതയല്ല, പരിത്യാഗിയല്ല ഞാന്‍
കാലകേയദർപ്പം ശമിപ്പിച്ചോള്‍!
രുദ്രയായ്, ഗൗരിയായ്
കാളിയായ്, ദുർഗയായ്
ആത്മാവിന്‍ നെരിപ്പോടുതകർത്തു
ശക്തിസ്വരൂപിണിയായ്
ഞാനുയിരം കൊള്ളട്ടെ !
സീതയല്ല , പരിത്യാഗിയല്ല ഞാന്‍
സർവ്വംസഹയാണ് ; സംഹാരിണിയാണ്
എവിടെ കാളകൂടങ്ങള്‍? നക്തഞ്ചരികള്‍?!
ശമിക്കുന്നില്ലയീക്ഷിതിയുടെ പാരവശ്യങ്ങള്‍
പൊറുക്കില്ലയിനിയീ രക്തരുചിരാംഗിതപീഡകള്‍;
സർവ്വംസഹയാണ്! സംഹാരിണിയാണ്!
എവിടെ കാളകൂടങ്ങള്‍? നക്തഞ്ചരികള്‍
സീതയല്ല പരിത്യാഗിയല്ല ഞാന്‍
ദുഷ്ടനിവാരിണിയാണ്!
സ്നേഹസ്വരൂപിണിയാണ്!
കണ്ണീരുണങ്ങാത്ത ഭ്രാന്തിയാം അമ്മമാരില്‍,
ചോരകിനിയും പാല്‍മണംമാറാചുണ്ടുകളില്‍,
ഇടനെഞ്ചുപൊട്ടി മാറോടണയ്ക്കും അച്ഛനില്‍ ,
അശനിപാതത്വം പൊഴിക്കും കന്യകയാം-
പാരിജാതമലരുകളില്‍നിന്നും
കത്തിജ്വലിച്ചാത്മശാന്തിക്കായ്
അലയടിച്ചലയടിച്ചായിരംതിരകള്‍ക്കൊപ്പം
സ്ഫുടംചെയ്തഗ്നികോരിക്കോരിക്കുടിച്ചാ-
വനാഴിനിറച്ച് ഹുങ്കാരമോടഷ്ടദിക്കുംകുതിച്ചു
ഞാന്‍ ഉണരട്ടെ! കണ്‍തുറക്കട്ടെ!!
എല്ലാർക്കുമമ്മയാം ഞാന്‍ ഉയിരംകൊള്ളട്ടെ
സ്നേഹസ്വരൂപിണിയാണ്, ദുഷ്ടനിവാരിണിയാണ്!
ലോകരക്ഷാര്‍ത്ഥം ഓരോയിതളിലും മലരിലും
പ്രപഞ്ചമാതാവാം ഞാന്‍ കണ്‍തുറക്കട്ടെ!
(തുടികൊട്ട് പുസ്തകം)
[ മായ ബാലകൃഷ്ണന്‍]
Comments
Post a Comment